વ્યક્તિ વિશેષ : રમતવીર ભલાજી ડામોર અને બાબુભાઈ પણુંચા

વિશ્વ કક્ષાએ અરવલ્લીને ગૌરવ અપાવનાર ક્રિકેટર ભલાજી ડામોર

            ભારતમાં ક્રિકેટને ધર્મ માનવામાં આવે છે અને તેના ખેલાડીઓને ભગવાનની જેમ પૂજવામાં આવે છે. ભારતમાં રામતવીરોમાં સૌથી વધારે માનપાન ક્રિકેટરો મેળવે છે. આવા ભારતમાં વિશ્વકપમાં શ્રેષ્ઠ પ્રદર્શન કરી ચૂકેલા અરવલ્લીના બલાઇન્ડ ક્રિકેટર ભલાજી ડામોર દારુણ ગરીબીમાં જીવન જીવવા મજબૂર છે. આવો આજે અવગત થઈએ બ્લાઇન્ડ વિશ્વકપના હીરો રહી ચૂકેલા ઓલરાઉન્ડર ખિલાડી અને અનેક હાડમારીઓ વચ્ચે જીવન ગુજારતા ભલાજી ડામોર વિશે. 

             અંધ ક્રિકેટ વિશ્વકપમાં ભારતને ગૌરવ અપાવનાર અરવલ્લી જિલ્લાના માલપુર તાલુકાના યુવાન ક્રિકેટર ભલાજી ડામોરની આ વાત છે. માલપુર તાલુકાના 1500ની વસ્તી ધરાવતું પીપરાણા ભલાજીનું ગામ છે. ભલાજી ડામોર 1998માં બ્લાઇંડ વિશ્વ કપના હીરો રહી ચુક્યા છે. સાત દેશો વચ્ચે રમાયેલી બ્લાઈન્ડ ક્રિકેટ વિશ્વકપમાં સર્વશ્રેષ્ઠ પ્રદર્શન કરનાર ભલાજી ડામોર હાલ દારુણ ગરીબીમાં જીવન પસાર કરી રહ્યા છે. 

           ઓલિમ્પિક્સ કે ક્રિકેટમાં વિજેતા બનનારને સરકાર કરોડો રૂપિયાના ઇનામ અને પ્રોત્સાહન આપે છે જયારે ગુજરાતને રાષ્ટ્રીય અને વિશ્વ કક્ષાએ ખ્યાતિ અપાવનારા એવા પણ ખેલાડીઓ છે કે જેમની સરકાર કે સમજે એની નોંધ પણ લીધી નથી . સરકાર દ્વારા પ્રોત્સાહન અને સહાય ન મળવાના કારણે ખેલાડીઓએ રમવાનું છોડી દેવું પડે છે અને નાનું-મોટું કામ મળે તે કરીને પેટનો ખાડો પૂરવો પડે છે. જો સરકાર દ્વારા આવા ખેલાડીઓને પૂરતું માર્ગદર્શન, પ્રોત્સાહન અને સહાય આપવામાં આવે તો આ ખેલાડીઓ પણ વિશ્વ કક્ષાએ મોટો મુકામ પ્રાપ્ત કરી શકે છે અને માનભેર જીવી શકે છે. 

       નેશનલ અને ઇન્ટરનેશનલ કક્ષાએ રાજ્યનું નામ ઉચું કરનાર આ ખેલાડીઓની હાલત જોઈને કોઈ ગરીબ કે સામાન્ય વ્યક્તિ સ્પોર્ટ્સમાં કરિયર બનાવવાનો વિચાર પણ નહીં કરે. ગુજરાત સરકાર દ્વારા માર્ચ, ૨૦૧૬માં નવી સ્પોર્ટ્સ પોલિસી લૉન્ચ કરવામાં આવી પણ જેમણે ખરેખર રાજ્યને સ્પોર્ટ્સ ક્ષેત્રે ગૌરવ અપાવ્યું છે તેમના માટે રાજ્ય સરકાર કંઈ કરી શકી નથી અને આ રમતવીરો કફોડી સ્થિતિમાં જીવી રહ્યા છે.

        ભલાજી ડામોર જન્મથી જ અંધ છે. તે સમયે તેના માતા-પિતાને અંધ પુત્ર હોવા બાબતે ભારે દુઃખ હતું. ગામની પ્રાથમિક શાળામાં પ્રાથમિક શિક્ષણ મેળવી રાષ્ટ્રીય અંધજન મંડળ ઇડર ખાતેની સંસ્થા સાથે જોડાયા અને અહીં અભ્યાસ કરી ધોરણ 10 પાસ કર્યું હતું. 

           બ્લાઇન્ડ હોવા છતાં રમત-ગમતમાં તેઓની રુચિ ગજબની હતી. પોતાની આગવી આવડતને કારણે અંધ વિદ્યાર્થીઓ સાથે 1992થી ક્રિકેટ રમવાનું શરુ કર્યું. શરૂઆતમાં સ્થાનિક કક્ષાએ ક્રિકેટ રમી તેમાં સારો દેખાવ કરી 1992માં ગુજરાત કપ રમી વિજેતા બન્યા. બાદ એ જ વર્ષમાં જોનલ કક્ષાએ પસંદગી પામ્યા. 1993 માં મહારાષ્ટ્રને હરાવી નેશનલ કક્ષાએ પોતાની કાબેલિયત પુરવાર કરી. સખત પરિશ્રમ કરી ઓલરાઉન્ડર તરીકે આ ખેલાડીએ સારી નામના મેળવી. આ ઉપરાંત અમદાવાદ અને મુંબઈ ખાતે અંધ વિશ્વ કપમાં પસંદગી પામવા માટે તનતોડ પુરુષાર્થ કર્યો.
            આખરે ધગશ પૂર્ણ કરેલી તેઓની મહેનત રંગ લાવી. અને બ્લાઇન્ડ વિશ્વ કપ માટે ભારતીય ટીમમાં તેઓ સ્થાન પામ્યા. 1998માં નવી દિલ્હી ખાતે સાત દેશો વચ્ચે યોજાયેલ બ્લાઈન્ડ ક્રિકેટ વિશ્વકપમાં ભલાજી ડામોરે ભારત દેશ વતી પ્રતિનિધિત્વ કર્યું. વિશ્વ કપ દરમિયાન રમાયેલ તમામ મેચોમાં તેઓએ શ્રેષ્ઠ પ્રદર્શન કર્યું. વિશ્વકપમાં ઓલરાઉન્ડર ક્રિકેટર તરીકે તેઓ ઉભરી આવ્યા. વિશ્વકપ દરમિયાન પાકિસ્તાન સામેની રસાકસીભરી દિલધડક મેચમાં 64 રન ફટકારી તેઓ નોટ આઉટ રહી, પાકિસ્તાનને ક્રિકેટના મેદાનમાં ધૂળ ચાટતું કરી, ભારતની ટીમને એકલે હાથે સેેમિફાઇનલમાં પ્રવેશ અપાવ્યો હતો. જ્યારે સાઉથ આફ્રિકા સામે રમી 10 ઓવરમાં 11 રન આપી ચાર વિકેટો ઝડપી સૌથી શ્રેષ્ઠ દેખાવ કર્યો હતો. ઉત્કૃષ્ટ પ્રદર્શન બદલ અનેક વાર તેઓ મેન ઓફ ધી મેચનો ખિતાબ હાંસલ કરવામાં સફળ રહ્યા. સમગ્ર વિશ્વકપ દરમિયાન ઓલરાઉન્ડર તરીકે ઉત્કૃષ્ટ પ્રદર્શન કરવા બદલ મેન ઓફ ધ સીરિઝનો ખિતાબ પણ ભલાજી તેમના નામે કર્યો હતો.બ્લાઈન્ડ ક્રિકેટ વિશ્વ કપમાં શ્રેષ્ઠ પ્રદર્શન કરવા બદલ તત્કાલીન રાષ્ટ્રપતિ કે.આર. નારાયણને ભલાજી ડામોરનું સન્માન કર્યું. વિશ્વ કપ દરમિયાન ભલાજીને અન્ય ખેલાડીઓ સચિન તેંડુલકર કહીને બોલાવતા હતા. સમગ્ર ક્રિકેટની સફરમાં અત્યાર સુધીમાં 150થી વધુ મેચો રમી અને 7000 થી વધુ રન તેઓએ બનાવ્યા છે. અને ૧૨૫ થી વધુ વિકેટો ઝડપી છે.

                આવા હોનહાર પ્રતિભાસંપન્ન ખેલાડીની હાલની આર્થિક પરિસ્થિતિ દયનીય છે. તેઓની પત્ની અનુ અને ઘરડા મા-બાપ કાળી મજૂરી કરી પેટનો ખાડો પુરવા મથી રહ્યા છે. તેઓના બે સંતાનો સતીશ અને આકાશના ભવિષ્ય ઉપર પણ પ્રશ્નાર્થ ચિહ્ન છે.

               ઇન્ટરનેશનલ ક્રિકેટ એસોસિયેશન દ્વારા આયોજિત વિશ્વકપની કોઈ એક મેચમાં શ્રેષ્ઠ પ્રદર્શન કરનાર સામાન્ય ખેલાડી પર સરકાર અને ખાનગી કંપનીઓ દ્વારા ઇનામોનો ધોધ વરસાવવામાં આવે છે. માત્ર એક ઇન્ટરનેશનલ ક્રિકેટ મેચ રમી સામાન્ય ક્રિકેટનો ખેલાડી કરોડોના આસામી બની જતા હોય છે. અને શાહી ઠાઠમાઠથી જીવન પસાર કરતા હોય છે. જ્યારે સંપૂર્ણ દ્રષ્ટિહીન ભલાજી ડામોર અનેક પડકારો વેઠી, ક્રિકેટ ક્ષેત્રે પોતાની કારકિર્દી ઘડી વિશ્વ કક્ષાએ ભારતને ગૌરવ પ્રદાન કર્યું હોવા છતાં આજે પશુઓ ચરાવી ગુજરાન ચલાવી રહ્યા છે. તેઓને મળેલ અનેક એવોર્ડ્સ અને ટ્રોફીઓ ઘરના ખૂણામાં એક પાટિયા પર મુક સાક્ષી બની હોનહાર ખેલાડીની જીવન ઘટમાળ નિહાળી રહી છે.

        ગરીબ માતા-પિતાએ દાગીના ગીરવે મૂકી, પેટે પાટા બાંધી ભલાજીની ક્રિકેટ ક્ષેત્રી કારકિર્દી ઘડવા પ્રોત્સાહન પૂરું પાડ્યું હતું. ઇન્ટરનેશનલ કક્ષાએ ક્રિકેટ રમ્યા પછી જાણે જિંદગી બદલાઈ જશે એવા અનેક સપનાઓ આ યુવાને સેવ્યા હતા. તેઓને શ્રદ્ધા હતી કે તેઓ દેશ માટે શ્રેષ્ઠ પ્રદર્શન કરશે તો સરકાર ચોક્કસથી તેઓને નોકરી અને આર્થિક બાબતે સહાય કરશે પરંતુ તેઓની આ આશા ઠગારી નીવડી. ખેલ મહાકુંભ જેવા તાઈફાઓ પાછળ કરોડો રૂપિયા વેડફી નાખનાર સરકારને આવા પ્રતિભાસંપન્ન ખેલાડીઓની કઈ જ પડી નથી કે નથી પડી સમાજને. ભારત દેશને ગૌરવ અપાવવા માટે પોતાની સમસ્ત કારકિર્દી હોડમાં મૂકી દેનાર ખેલાડીનો પરિવારને આજે બે ટંક પેટનો ખાડો પુરવા માટે પણ ફાંફા મારવા પડે છે. વિશ્વ કપ રમી ચૂકેલા પ્રતિભાસંપન્ન ખેલાડીની આવી દયનીય સ્થિતિ જોઈ કોઇપણ યુવાન રમત-ગમત ક્ષેત્રે કારકિર્દી ઘડતા પહેલાં સો વખત વિચાર કરશે. 

            વિશ્વ કક્ષાએ ભારતને સન્માન અપાવવા જેણે પોતાનું જીવન રમત ગમત માટે ન્યોછાવર કરી દીધું એવો પરિવાર ઘોર અંધકારમાં જીવી રહ્યો છે. આશા છે કે સરકાર કે કોઈ સામાજિક સંસ્થા સુધી આ વાત પહોંચે. સરકાર અને સામાજિક સંસ્થાઓ સુધી આ વાતને પહોચાડવા આપ પણ માધ્યમ બની શકો છો. શક્ય છે કે ઘોર અંધકારમાં જીવતા ભાલાજીના માસૂમ સંતાનો સતીશ અને આકાશને ઉજ્જવળ ભવિષ્ય સાંપડે.

ઓલમ્પિક ક્વોલિફાઇડ, આંતરરાષ્ટ્રીય ખ્યાતિપ્રાપ્ત રમતવીર 

બાબુભાઈ પણુંચા

                   બાબુભાઈ પણુંચા.

               અથાગ પરિશ્રમ અને દૃઢ મનોબળ થકી વિશ્વ કક્ષાએ રાષ્ટ્રને સન્માન અપાવનાર આંતરરાષ્ટ્રીય ખ્યાતિપ્રાપ્ત ખેલાડી છે. આ રમતવીરે પોતાની સમસ્ત યુવાની રાષ્ટ્ર સેવામાં સમર્પિત કરી દીધી છે. 23 વર્ષ અને 4 મહિના ઇન્ડિયન આર્મીમાં સેવાઓ આપી. સાથે સાથે કઠોર સાધના અને ભગીરથ પુરુષાર્થ થકી ઓલમ્પિકમાં ક્વોલિફાઇ કરનાર બાબુભાઈ ગુજરાતના એકમાત્ર ખેલાડી છે. 

               રમત ગમતમાં આંતરરાષ્ટ્રીય ક્ષેત્રે ભારતને સન્માન અપાવવા માટે પોતાની આખી યુવાની રમતના મેદાનમાં ખરચી નાખી. ભારત દેશને વિશ્વ કક્ષાએ અનેક સન્માનો અપાવ્યાં. અને આજે આંતરરાષ્ટ્રીય ખ્યાતિપ્રાપ્ત આ ખેલાડી આજે કાળી મજૂરી કરી ગુજરાન ચલાવવા મજબૂર બન્યો છે. થોકબંધ પ્રમાણપત્રો અને ઢગલાબંધ ચંદ્રકો આંતરરાષ્ટ્રીય ખેલાડીના માટીના કાચા મકાનમાં ધૂળ ખાઈ રહ્યાં છે. દેશ અને વિદેશનું એક પણ પ્રતિષ્ઠિત અખબાર એવું નહીં હોય જેમાં બાબુભાઇનો ફોટો ન છપાયો હોય. દેશની એક પણ એવી ટી.વી ચેનલ એવી નહીં હોય કે જેમાં બાબુભાઈ ની સ્ટોરી કવર ન કરી હોય ! દેશ અને દુનિયામાં બાબુભાઈ ને પ્રસિદ્ધિ તો ખૂબ મળી. પરંતુ માત્ર પ્રસિદ્ધિથી પેટ થોડું ભરાય છે?? વિશ્વ સ્તરે દેશનું નામ રોશન કરનાર આ હોનહાર ખેલાડી જ્યારે પોતાની વ્યથા  વર્ણવે છે ત્યારે આપણી આંખ પણ આંસુઓથી ભરાઈ આવે છે.

         અરવલ્લી જિલ્લાના માલપુર તાલુકાનું અંબાવા ગામ તેઓનું વતન. પિતા માત્ર ચાર ચોપડી ભણેલા. પિતાજી દાળી મજૂરી કરી પરિવારનું ગુજરાન ચલાવતા હતા. ઘરની આર્થિક પરિસ્થિતિ એટલી કંગાળ કે બે ટંકનું ભરપેટ ભોજન પણ ન મળે. ઘરમાં બીજી પ્રાથમિક સુવિધાઓ તો દૂરની વાત છે. ઘરમાં ઘડિયાળ સુધ્ધાં ન મળે. ઘર આગળ આવતા તડકાને આધારે સમય નક્કી કરી શાળાએ જવું પડતું. અનેક અભાવોમાં બાબુભાઈનું બાળપણ વીત્યું છે. પ્રાથમિક શિક્ષણ ગામની પ્રાથમિક શાળામાં લીધું. અને હાઈસ્કૂલના અભ્યાસ માટે માલપુર જવું પડતું. શાળામાં ચાલીને જવું પડતું. સાયકલની વાત તો દૂર રહી પગમાં પહેરવા ચપ્પલ પણ ન મળે. બીમાર માતાની સારવાર માટે રોજ બપોર પછી શાળાએથી ઘરે જતું રહેવું પડતું. ઘરકામની તમામ જવાબદારી બાબુભાઈના શિરે હતી. એક બાજું અભ્યાસ, બીજી બાજું ઘરકામ અને પરિવારની આર્થિક મદદ માટે દાળી પણ જવું પડતું. માટે અભ્યાસમાં પૂરતું ધ્યાન ન આપી શક્યા. માંડ બે ટ્રાયલે દસમું પાસ કર્યું. બીમાર માતાની સેવા સુશ્રુસા કરવા દસમા પછી ઓછી ઉંમરે જ લગ્ન કરવાં પડ્યાં. પત્ની પણ નિરક્ષર. 

                    ઘરની સ્થિતિ જોતાં આગળ અભ્યાસ કરવો પોસાય એમ પણ ન હતો. પિતાને આર્થિક મદદ મળી રહે એ માટે નાની મોટી નોકરી કરવાનો સંકલ્પ કર્યો. દેશ સેવાની આગ દિલમાં પહેલેથી જ પ્રજ્વલિત હતી. મામાનું માર્ગદર્શન મળ્યું. અને ઇન્ડિયન આર્મીમાં ભરતી થવાનું નક્કી કરી લીધું. બાળપણથી જ કરેલા કઠોર પરિશ્રમને કારણે શરીર કસાયેલું અને ખડતલ હતું. મામા સાથે સૈન્યની ભરતીમાં અમદાવાદ હનુમાન કેમ્પ ગયા. હોટેલમાં રોકાવાના તો પૈસા હતા નહીં એટલે શીંગ ચણા ખાઈ ત્યાં ઓટલા ઉપર જ કંતાન પાથરી સૂઈ ગયા. બીજા દિવસે સવારે દોડ લગાવાની હતી. આ દોડ જ આગળનું ભવિષ્ય નક્કી કરવાની હતી. રાતનું ભૂખ્યું પેટ અને પૂરતી ઊંઘ પણ થઈ ન હતી. આટલી ભીડમાં કેવી રીતે દોડ પુરી કરવી?? ત્યાં તો ઘરનાં દૃશ્યો નજર આગળ તરવળવા લાગ્યાં. કસીને મુઠ્ઠીઓ વાળી અને કચકચાવી ને દોડ લગાવી. જાણે કોઈ દૈવી શક્તિ જ મદદે પહોંચી. અને એ બધા ઉમેદવારોમાં બાબુભાઈ પ્રથમ આવ્યા. 

           સૈન્યમાં ભરતી થતાં પ્રથમ પોસ્ટિંગ જ સિયાચીન ગ્લેશિયરમાં થયું. ચોતરફ છવાયેલા બરફ અને ઓક્સિજનની ઉણપ વચ્ચે એક એક પળ પસાર કરવી દુષ્કર હતી. માંડ દસ ડગલાં ચાલો ત્યાં હાંફ ચડી જાય. અહીં તેઓના મનોબળની ખરી કસોટી થઈ. પરંતુ દિલમાં દેશ માટે કંઈક કરી છૂટવાનું ઝનૂન એટલું જબરદસ્ત હતું કે ગમે તેવી મુશ્કેલ પરિસ્થિતિ સામાન્ય બની જતી. 

             થોડા જ વખત બાદ તેઓનું પોસ્ટિંગ દહેરાદૂન ખાતે થયું અને જીવનમાં એક નવો ટર્નિંગ પોઇન્ટ આવ્યો. અહીં આર્મી જવાનો માટે રમત ગમતની સ્પર્ધામાં ભાગ લેવો ફરજીયાત હતો. બાબુભાઈને રમત ગમતમાં કોઈ રસ ન હતો. એમને તો બસ બંદૂક ચલાવવામાં જ રસ હતો. પરંતુ કમાન્ડરના કહેવાથી દોડમાં ભાગ લેવો પડ્યો. એક સાથે 700 જવાનોની દોડ થઈ અને તેમાં બાબુભાઈ પ્રથમ આવ્યા. કમાન્ડર આ જોઈ ચકિત થઈ ગયા. એમને લાગ્યું "ઈસ બંદે મેં દમ હૈ" કમાન્ડરે બાબુભાઈ ને પૂછ્યું "દેશ કે લિયે દોડગે??" બાબુભાઇએ જવાબ આપ્યો "મેં સિર્ફ બંદૂક ચલાઉગા" કમાન્ડરે બાબુભાઈને ખૂબ સમજાવ્યા 50 કિલોમીટરની દોડ માટે તૈયાર કર્યા. અને પછી પ્રેક્ટિસ ચાલું થઈ. બાબુભાઈ રોજ રાત્રે 2 વાગે ઉઠી જાય અને દોડવાનું શરૂ કરે. સવાર સુધી પ્રેક્ટિસ ચાલું રાખે. 

              તનતોડ મહેનત કરી. વર્ષ 2004માં યોજાયેલી ઓલ ઇન્ડિયા આર્મીની સ્પર્ધામાં બાબુભાઈ ચોથા નંબરે આવ્યા. ફરી મહેનત આદરી શ્રેષ્ઠ પ્રદર્શન કર્યું. પરંતુ રમત પણ રાજનીતિથી અછૂત નથી. કોચની રાજનીતિનો ભોગ બાબુભાઈ બન્યા. અને નેશનલ ટીમમાંથી નામ કાઢી નાખવામાં આવ્યું. શ્રેષ્ઠ પ્રદર્શન કરવા છતાં નામ કાઢી નાખતા કર્નલ સાથે ઉગ્ર બોલાચાલી થઈ. નોકરીની પરવા કર્યા વિના તેઓએ કર્નલની વિરુદ્ધ માં ઉચ્ચ સ્તરે રજૂઆતો કરી. તેઓ દોડની સ્પર્ધાના ખેલાડી હતા. કોચના સમજાવવાથી walking race માટે પ્રેક્ટિસ ચાલુ કરી. અને આર્મી, નેવી અને એઈર ફોર્સ એમ ત્રણેય પાંખની સ્પર્ધામાં બાબુભાઈ મેદાન મારી ગયા. તેઓને  સિપાઈમાંથી હવાલદાર તરીકે પ્રમોશન મળ્યું. 

             ત્યારબાદ પ્રેક્ટિસ માટે તેઓનું દિલ્હી ખાતે પોસ્ટિંગ થયું. અહીં તેઓ રાત્રે 1 વાગે ઉઠી સવાર સુધી પ્રેક્ટિસ ચાલુ રાખતા. અને 2007 માં યોજાયેલી સર્વિસીઝની કોમ્પિટિશનમાં તેઓએ આર્મી ને ગોલ્ડ મેડલ અપાવ્યો. બાબુભાઈની આ સફળતા કેટલાંક લોકો પચાવી ન શક્યા. એ વખતના ભારતીય કોચ હનુમાના રામ બાબુભાઈ ને કહ્યું કે "ગેમ કરને કી આપકી ઉમ્ર બિત ચુકી હૈ. આપકી બોડી મેં વો કરંટ નહીં રહા".

              નેશનલ કોચનાં આ વાક્યો સાંભળી સહેજ પણ નાસીપાસ થયા વિના એક ઝનૂન સાથે મહેનત ચાલું રાખી. અને એ જ વર્ષમાં ભોપાલ ખાતે એક રાષ્ટ્ર કક્ષાની સ્પર્ધા થઈ. એમાં 20 કિ.મી. walking race માં બાબુભાઈ એ નેશનલ રેકોર્ડ નોંધાવ્યો. ત્યારે હનુમાના રામ કોચ ત્યાં હાજર જ હતો. બાબુભાઈ એ કોચને ખોટો સાબિત કર્યો. ત્યારે એ કોચની સ્થિતિ દયનિય હતી. તેના પંદર દિવસ બાદ ટાટાનગર જમશેદપુરમાંં યોજાયેલ સિનિયર ઓપન એથલેટીક ચેમ્પિયનશીપમાં નવો નેશનલ રેકોર્ડ સ્થાપિત કર્યો. 20 કિ.મી. walking race માત્ર 1 કલાક 23 મિનિટ અને 40 સેકન્ડ માં પૂર્ણ કરતાની સાથે જ બાબુભાઈ ઓલમ્પિક માટે ક્વોલિફાઇ થયા. તેઓને બેસ્ટ એથ્લેટ ઘોષિત કરવામાં આવ્યા. આ ઘટના અરવલ્લી માટે , ગુજરાત માટે અને દેશ માટે ઐતિહાસિક ઘટના હતી. ઓલમ્પિકનું નામ સાંભળતા જ સામાન્ય માણસના દિલની ધડકનો તેજ બની જાય છે. ઓલમ્પિક એ વિશ્વના શ્રેષ્ઠ રમતવીરોનો મહાકુંભ છે. તેમાં ભાગ લેવો દરેક રમતવીરનું સપનું હોય છે. પરંતુ લાખો રમતવીરોમાંથી જવલ્લે જ કોઈ રમતવીર આ સપનું સાકાર કરી શકે છે. વર્ષોની સાતત્યપૂર્ણ મહેનત અને જીવનની પળે પળ પોતાના લક્ષય પાછળ ખરચી નાખનાર ખેલાડીઓ ઓલમ્પિક સુધી પહોંચી શકે છે. 

        અરવલ્લી જિલ્લાના અંતરીયાળ ગામડાના એક સામાન્ય પરિસ્થિતિમાંથી આવનાર વ્યક્તિએ પોતાની કાબેલિયતથી દેશ અને દુનિયામાં ડંકો વગાડી દીધો. 2008 ની લંડન ખાતે યોજાયેલી ઓલમ્પિક માં ભાગ લેવા જવા માટે જ્યારે બાબુભાઇ પાસપોર્ટ ઓફિસમાં પાસપોર્ટ બનાવવા ગયા તે વખતે પાસપોર્ટ ઓફિસરે એક પણ રૂપીયો લીધા વિના જ પાસપોર્ટ બનાવી આપ્યો. 

           2007 માં બાબુભાઈ પણુંચાને રાજ્ય સરકાર દ્વારા સરદાર પટેલ એવોર્ડથી સન્માનિત કરવામાં આવ્યા.

           ભારતનું કમનસીબ કે ત્રણ મહિના લંડનમાં પ્રેક્ટિસ દરમિયાન બાબુભાઈ મને હાર્ટનો દુખાવાને કારણે ઓલમ્પિક માં ભાગ ન લઈ શક્યા. 

ઓલમ્પિક બાદપણ તેઓ રશિયા, ઈંગ્લેન્ડ, ઉત્તર કોરિયા, જાપાન, ચીન, પોલેન્ડ જેવા 30 ઉપરાંત દેશોમાં જઈ અનેક કોમ્પિટિશનમાં ભાગ લીધો. અને ઘણા એવા મેડલ ભારતને અપાવ્યાં. સતત પ્રેક્ટિસ ને કારણે 2010 માં પગના મસલ્સને ગંભીર ઇજાઓ થઈ. એમ છતાં સાહસ કરી દિલ્હીમાં યોજાયેલ કોમનવેલ્થ ગેમ્સમાં ભાગ લીધો. મસલ્સ પેઇનને 18 કિ. મી. ચાલતા ચાલતા બેભાન થઈ ગયા. 

           તાજેતરમાં જ ભારત માટે આનંદના સમાચાર આવ્યા. 14 મેં 2012 ના રોજ રશિયા ખાતે યોજાયેલ IAAF ની કોમ્પિટિશન માં આખા વિશ્વના સ્પર્ધકોમાં બાબુભાઈ ચોથા ક્રમે આવ્યા હતા.  એ સ્પર્ધામાં ત્રીજા ક્રમે અસવાનાર યુક્રેનનો ખેલાડી પરના ડોપિંગના આરોપો સાબિત થતાં એ ખેલાડી ડિસ્ક્વોલિફાઇડ જાહેર કરતા બ્રોન્ઝ મેડલના સાચા હકદાર બાબુભાઈ બન્યા છે. બ્રોન્ઝ મેડલ પ્રાપ્ત થતાં ફરી એક વાર બાબુભાઈ ભારતની શાન વધારી છે.  

               કરમની કાઠીનાઈ એ છે કે જે ખેલાડીએ દેશ માટે પોતાની યીવાની ખરચી નાખી છે. એ ફોજી જવાન છેલ્લા દોઢ વર્ષથી ઘરે કાળી મજૂરી કરી દિવસો પસાર કરે છે. ફોજમાંથી નિવૃત્ત થઈ ને ઘરે આવ્યા બાદ પોતાના પુત્રનો અકસ્માત થતાં તમામ બચત દીકરાની સારવાર પાછળ ખરચી નાખી. અનેક નેશનલ રેકોર્ડ જેના નામે છે એવા આ ખેલાડીને રહેવા માટે પાકું મકાન પણ નથી. ફોજીની નોકરીની નિવૃત્તિ બાદ બીજી નોકરી માટે વલખા મારવાં પડે છે. માટીના કાચા મકાનમાં આ આંતરરાષ્ટ્રીય આ ખેલાડી વસવાટ કરવા મજબૂર છે. આખો દિવસ ખેતરમાં મજૂરી કરે છે. અને રાત્રે 2 વાગે ઉઠી ચાલવાની પ્રેક્ટિસ કરે છે. બાબુભાઈ 2020 ની ઓલમ્પિક ની તૈયારી કરી રહ્યા છે. પરંતુ કોમ્પિટિશન માટે જોઈતા પ્રોફેશનલ શૂઝ દસ હજારના આવે છે. એ લાવવાના પણ આ રમતવીર પાસે પૈસા નથી. તેઓનું બ્રાન્ડેડ શોર્ટસ અને બનીયાનની કિંમત ચાર થી પાંચ હજાર થાય છે.

          આર્થિક તંગીને કારણે સાધનોના અભાવો વચ્ચે આ ખેલાડીની સાધના ચાલું છે. એક બાજુ આવા હોનહાર ખેલાડીઓની રાજ્ય સરકાર અને કેન્દ્ર સરકાર દ્વારા ઘોર ઉપેક્ષા કરવામાં આવી રહી છે અને બીજી બાજુ ખેલ મહાકુંભ ના તાયફાના નામે કરોડો રૂપિયા વેડફી નાખવામાં આવે છે. પોતાની પ્રસિદ્ધિ માં કારીડો વેડફતી નઠોર સરકાર આવા રમતવીરો માટે આગળ ક્યારે આવશે??? સવા સો કરોડની વસ્તી ધરાવતો ભારત દેશમાં અનેક પ્રતિભાસંપન્ન ખેલાડીઓ હોવા છતાંઓલમ્પિક માં એક ગોલ્ડ મેડલ લાવવા ફાંફા પડે છે એ માટે આવા અનેક કારણો જવાબદાર છે. 

             જાડી ચામડીના રાજનેતાઓને આવા ખેલાડીઓની વાત સાંભળવાનો સમય જ ક્યાં છે?? સરકાર આગળ આવે કે ન આવે કોઈ સામાજિક સંસ્થાઓ કે કોઈ સંપન્ન વ્યક્તિઓ આવી પ્રતિભાઓને મદદ કરે એ પણ એક જાતની દેશ સેવા જ છે.



 (આવી જ વિરલ વ્યક્તિ વિશેની રસપ્રદ વાતો જાણીશું આવતા ગુરુવારે...)   

લેખન : ઈશ્વર પ્રજાપતિ

આપ આપના પ્રતિભાવ નીચેના whatsapp no. પર લખી મોકલી શકો છો.

(98251 42620)

નોંધ:- મિત્રો બ્લોગની લિંક આપ શેર કરી શકો છો પરંતુ  બ્લોગના આર્ટિકલ્સને પોતાના નામે ચડાવી વાયરલ કરવાનો અવિવેક ન કરવા વિનંતી.